Рэспубліканскі семінар кіраўнікоў музеяў устаноў адукацыі
15 лістапада 2018 года у мэтах удасканалення адукацыйнай дзейнасці музеяў устаноў адукацыі ў горадзе Нясвіжы Мінскай вобласці арганізаваны рэспубліканскі семінар кіраўнікоў музеяў устаноў адукацыі «Выкарыстанне адукацыйнай прасторы музея для грамадзянскага і патрыятычнага выхавання дзяцей і моладзі: вопыт і перспектывы».
Арганізатарамі семінара выступілі Міністэрства адукацыі Рэспублікі Беларусь, Рэспубліканскі цэнтр экалогіі і краязнаўства сумесна з галоўным упраўленнем па адукацыі Мінаблвыканкама, Мінскім абласным інстытутам развіцця адукацыі і ўпраўленнем адукацыі, спорту і турызму Нясвіжскага райвыканкама.
У рэспубліканскім семінары прынялі удзел Алена Уладзіміраўна Ануфровіч, дырэктар Рэспубліканскага цэнтра экалогіі і краязнаўства, Святлана Уладзіміраўна Сітнікава, рэктар Мінскага абласнога інстытута развіцця адукацыі, Аляксандр Васільевіч Храмы, намеснік дырэктара Нацыянальнага гістарычнага музея Рэспублікі Беларусь, Святлана Анатольеўна Шатрун, намеснік начальніка ўпраўлення адукацыі, спорту і турызму Нясвіжскага райвыканкама, навукоўцы, кіраўнікі музеяў устаноў адукацыі з усіх рэгіёнаў краіны, усяго 50 чалавек.
Падчас правядзення рэспубліканскага семінара яго ўдзельнікі пазнаёміліся з рэгіянальным вопытам музейнай дзейнасці, заслухалі выступленні навукоўцаў і кіраўнікоў музеяў па пытаннях выкарыстання рэгіянальнай адукацыйнай прасторы для грамадзянска-патрыятычнага выхавання моладзі, разгледзелі шляхі ўзаемадзеяння музеяў устаноў адукацыі з дзяржаўнымі музеямі сістэмы Міністэрства культуры.
У рамках праграмы рэспубліканскага семінара адбылося знаёмства з вопытам музейнай дзейнасці ўстаноў адукацыі Мінскай вобласці. Удзельнікам семінара прэзентаваны: інтэрактыўныя формы работы з наведвальнікамі музея УА «Нясвіжскі дзяржаўны каледж імя Якуба Коласа», адукацыйныя праграмы па далучэнні дзяцей і моладзі да пазнання гісторыі і культуры краю ДУДА «Цэнтр дзіцячай творчасці Нясвіжскага раёна», панарама музейнага вопыту “Малая радзіма вялікіх людзей” - стэндавыя экспазіцыі музеяў устаноў адукацыі Мінскай вобласці.
Акрамя таго, удзельнікі семінара пазнаёміліся з экспазіцыйнай дзейнасцю ДУ «Нацыянальны гісторыка-культурны музей-запаведнік «Нясвіж» і Гарадской ратушы.